«Վաղվա հավաքի նպատակն է ոչ ասել դեսպանին իր պահվածքով, որ իրեն պահում է որպես փոխարքա»,-այսօր «Զարկերակ» մամուլի ակումբում հայտարարեց ԱԻՄ նախագահ Պարույր Հայրիկյանը:

Պարույր Հայրիկյանի տեղեկացմամբ՝ վաղվա բողոքի ցույցը կմեկնարկի Ազատության հրապարակից՝ ժամը 14.00-ին: Հիշեցնենք, որ հավաքի նախաձեռնությունը ծնվեց օրեր առաջ, երբ Ազատության հրապարակում նախաձեռնել էին բողոքի երթ՝ դեպի Ռուսաստանի դեսպանատուն, սակայն նախաձեռնողներն այդպես էլ չհայտնվեցին:

Ուստի ծնվեց մայիսի 18-ին հավաք անցկացնելու քաղաքացիական նախաձեռնություն: Վաղը նախաձեռնության մասնակիցները Ազատության հրապարակից երթ կկազմակերպեն դեպի Ռուսաստանի դեսպանատուն՝ Աբովյան, Ամիրյան, Զաքյան փողոցներով ռուսական դեսպանություն, հնարավոր է ՌԴ դեսպանին հանձնեն նաև ուղերձ:

Իրազեկման երթը կշարունակվի Մաշտոցի պողոտայով, կլինի իրազեկման երթ, որի ընթացքում կբաժանվի այն ուղերձը, որը պետք է տրվի ՀՀ-ում ՌԴ դեսպանին: Այնուհետև հնարավոր է երթը շարունակվի ու ավարտվի նախագահի նստավայրի դիմաց»:

Պարոն Հայրիկյանը կոմունիստներին «հիվանդ» անվանեց՝ մատնանշելով նրանց մայիսմեկյան հանրահավաքը, երբ գովում էին Պուտինին: Պարույր Հայրիկյանը հիշեցրեց, թե «Պուտինը կոմունիստ» չէր, գոնե Զյուգանովին գովեին:

Դառնալով ՀՀ իշխանությունների վարած քաղաքականությանը՝ նշեց. «ՀՀ իշխանությունները Ռուսաստանի ճորտերն ու հարճերն են: Մենք պիտի փորձենք սահմանազատվել մեր իշխանություններից որքան կարող ենք: Վաղը պիտի կարողանանք թեկուզ հարյուր հոգով ցույց տալ, որ այս իշխանությունները մերը չեն, ոչ, մենք բթամիտների հանրություն չենք: Մեր առաջին քայլն այն է, որ պետք է ՀՀ ժողովուրդը սահմանազատվի ՀՀ իշխանություններից»:

Aravot.am-ը հետաքրքրվեց՝ արդյոք ծանո՞թ է կուտակայինի «լրամշակված» նախագծին՝ նշեց. «Նման մանր-մունր հարցերով մենք չենք զբաղվում: Այս հարցը ուշագրավ էր մեզ համար այնքանով, որ այս հարցում խոսվում էր քաղաքացիների ինքնորոշման իրավունքների մասին, եթե պարտադիր է, ուրեմն հակասում է քաղաքացու իրավունքներին: Մնացյալը ցույցեր արեցին, խաղացին, լաց եղան, պրիմիտիվ ներկայացումների շարք էր»:

Հարցին՝ այդ դեպքում հազարավոր քաղաքացիների բողոքն անհի՞մն էր, պարոն Հայրիկյանը պատասխանեց. «Դեմ եմ» շարժումը զրո շարժում է: Երկու հարյուր քսան միլիոն մարդ հավաքված էր սովետական միության զրոյում: Առողջ մարդիկ գնում են հանուն ինչ-որ բանի, ոչ թե դեմ: Իրենք հպարտ են, որ դեմ են, դուք հպարտ եղեք, որ կողմ եք: Ցուլերը դեմ են կարմիր լաթին, կարմիր լաթը ցույց ես տալիս, դեմ են, ցույց չես տալիս դեմ չեն: Դրա համար ես ասում եմ, որ դա զրո շարժում է: Եթե դեմ էին, թող Մաքսայինին դեմ լինեին, բա ռուսական պապանե՞րը»:

Տաթև ՀԱՐՈՒԹՅՈՒՆՅԱՆ

Աղբիւր՝ Aravot.am

Հայաստանյան պետական քարոզչամեքենան աշխատում է գոյություն չունեցողը պանծացնելու ուղղությամբ: Ստրուկներն ու ճորտերն աշխատում են իրենց տերերի համար: Այսօր տեղի ունեցած մամուլի ասուլիսի ժամանակ այս մասին ասաց ԱԻՄ նախագահ Պարույր Հայրիկյանը՝ անդրադառնալով Հայաստանի՝ ՄՄ-ին անդամակցելու թեմային:

«Հայաստանը կամովին գլուխը մտցրեց մահաբեր օղակի մեջ: Ինչպես Երևանյան լճի մոտ կանգնողներին են ուրախացնում փողով, այնպես էլ ճորտ դարձած հայ իշխանավորներին Ռուսաստանըւ փորձում է ուրախացնել գազի սակագնի մի քանի կոպեկ էժանացմամբ: 

Ռուսաստանն աշխարհի ամենահետամնաց երկրներից մեկն է: Ի՞նչ տնտեսական աջակցության մասին են խոսում: ՄՄ-ին Հայաստանի անդամությունը մեր երկրի պատմության մեջ ամենանվաստացնող ու ստորացնող քայլերից էր: Կիսադեմոկրատական Հայաստանը այդ կառույցին անդամակցելու դեպքում կդառնա ամբողջովին դիկտատորական, ինչպիսին են ՄՄ-ի անդամ հանդիսացող Ռուսաստանը, Ղազախստանն ու Բելառուսը»,- ասաց ԱԻՄ ղեկավարը:

Նրա խոսքով՝ մենք ՌԴ-ի հետ պետք է այնպիսի հարաբերություններ ունենանք, ինչպիսին ունենք Ինդոնեզիայի կամ Թուրքիայի հետ: 

«Ռուսների հետ մենք երբեք բարեկամ չենք եղել, ռուսի մուտքը Հայաստան նշանավորվեց Դավիթ-Բեկի կործանմամբ, Խաչատուր Աբովյանին Սիբիր քշելով: Պուտինի համար Հայաստան չկա, Պուտինի համար կա Անդրկովկաս: Ռուսաստանի շովինիստների և Պուտինի ցանկությունն է եղել ոչնչացնել հայերին, Հայաստանը թողնել առանց հայերի:

Հիմա էլ գալիս, պաշտոնապես ասում է՝ «դուք հայ չեք, այլ անդրկովկասցի»: Վաղը-մյուս օրը, եթե այս տխմարները չսթափվեն, Հայաստանը կկոչվի Ռուսաստանի անդրկովկասյան պրովինցիա: Սա Ռուսաստանին, ԿԳԲ-ին ծախված ճորտերի մտայնություն է»,- ասաց Պարույր Հայրիկյանը:

Քաղաքական գործիչը նկատեց, որ նախկինում հայ ժողովրդի միայն 23 տոկոսն էր կողմ ՄՄ-ին անդամակցությանը, մինչդեռ իշխանությունների ջանքերով անհեթեթ գաղափարը պարտադրվեց բոլորին: 

«Անցկացված քարոզարշավի արդյունքում ՄՄ-ին անդամակցելու կողմ մարդկանց տոկոսը կհասնի ամենաշատը 30 տոկոսի»,- կանխատեսեց Հայրիկյանը:

Վերջում ԱԻՄ նախագահը հիշեցրեց, որ իրենց հանրահավաքը Ազատության հրապարակում տեղի կունենա ուրբաթ, երեկոյան ժամը 5-ին: 

«Նախորդ անգամ եղանակը մեր կողմից չէր, և քաղաքական շատ ուժերի ներկայացուցիչներ, ովքեր պետք է գային ու ելույթներ ունենային, փոխեցին իրենց մտադրությունը»,- պարզաբանեց նա: