Լուսինե բադալյաններն ու չգիտեմ ինչյանները Հայրիկյանի եղունգի չափ վաստակ չունեն մեր պետության կառուցման գործում. Կարո Եղնուկյան

Քիչ առաջ mardik.am-ը զրուցեց  ԱԻՄ առաջնորդ Պարույր Հայրիկյանի մտերիմ ընկեր Կարո Եղնուկյանի հետ՝ կառավարության որոշման  դեմ ուղղված արձագանքների մասին:

Հիշեցնենք, որ կառավարությունը Պարույր Հայրիկյանի բուժման համար տրամադրել է 20 մլն 500 հազար դրամ: Որոշումն արժանացել է բացասական արձագանքների, անգամ   ֆեյսբուքյան խումբ է բացվել ՝ «ընդդեմ կառավարության որոշման» անվանումով:

Պրն Եղնուկյանի խոսքով՝ այդ բարբաջանքները նույն աղբյուրից են, այսինքն՝ երբ  մահափորձից հետո հայտարարեցին, որ Պարույր Հայրիկյանը վիրավորվել է ուսից. «Հաղորդավարուհի Լուսինե Բադալյանը նորից շեշտում է այդ  նույն սուտը՝ Հայրիկյանն ուսից է վիրավորվել: Հայրիկյանի ուսին չեն կրակել, այլ կրծքավանդակին երկու անգամ»։

Անդրադառնալով  կառավարության որոշմանը՝ Կարո Եղնուկյանը տեղեկացրեց, որ Պարույր Հայրիկյանը գումար չի պահանջել. «Կարծես թե միտումնավոր ուզում են Հայրիկյանին վարկաբեկել»,-  ասաց  զրուցակիցս՝ հավելելով, որ Հայրիկյանը տեղյակ չի եղել և իրեն անգամ չի հետաքրքրել՝ ինչքան գումար կհատկացնեն. «Այդ բարբաջողները չեն հասկանում, որ խոսքը մարդու առողջության մասին է:Մի մարդ, ով իր ամբողջ կյանքը անցկացրել է բանտերում՝ հանուն Հայաստանի անկախության,մարդ, ով   մեր պետության  կերտման գործում դրական  ներդրում է ունեցել, երբևէ պաշտոն չի ունեցել, մերսեդեսներ և բենթլիներ չի քշում,  պալատներ, բիզնեսներ չունի:  Այդ մարդու վրա մահափորձ են կատարում, որի պատճառով նա երկու ամիս ցավերի մեջ է լինում: Հիմա էդ մարդուց ինչ եք ուզում, չգնա՞ բուժվի այդ մարդը:  Լուսինե բադալյաններն ու չգիտեմ  ինչյանները  Հայրիկյանի եղունգի չափ վաստակ չունեն  մեր պետության կառուցման գործում»,- ասաց պրն Եղնուկյանը՝ հավելելով, որ այդ գումարը վճարվելու է այն հիվանդանոցին, որտեղ  բուժվելու է ԱԻՄ ղեկավարը:

Աղբյուր՝ mardik.am

• < Prev
• Next >